Samstarfsverkefni á sviði starfsmenntunar

Samstarfsverkefnum sem styrkt verða er sérstaklega ætlað að styðja við áherslur Evrópusambandsins á sviði menntunar.

Markmið samstarfsverkefna (Cooperation Partnerships og Small-Scale Partnerships)

• Að auka gæði starfsemi samstarfsaðilanna í verkefninu og deila nýjungum með öðrum, þvert á fag- og starfsgreinar.

• Að styrkja stofnanir sem vinna þvert á landamæri og milli mismunandi skólastiga og fagreina.

• Að mæta sameiginlegum þörfum og forgangsatriðum á sviði menntunar, þjálfunar og æskulýðsstarfs.

• Að stuðla að framförum (hjá einstaklingum, stofnunum eða innan einstakra geira) sem leitt geta til þróunar og nýrra aðferða sem nýtast aðilum af mismunandi stærð og gerð.

Í minni samstarfsverkefnum (Small-Scale Partnerships) er að auki stefnt að eftirfarandi atriðum:

• Að auka tækifæri og hvetja til þátttöku nýliða, þeirra sem hafa litla reynslu af því að taka þátt í evrópsku samstarfi og smærri aðila. Þessi verkefni geta verið fyrstu skref Evrópusamstarfs.
• Að styðja við markmið inngildingar og þátttöku fólks sem hefur færri tækifæri.
• Að styðja við markmið um virka þátttöku í samfélaginu og að færa Evrópskar áherslur að nærsamfélaginu.

Öll samstarfsverkefni á sviði starfsmenntunar þurfa sömuleiðis að styðja við a.m.k. eitt af þeim forgangsatriðum sem ákveðin hafa verið fyrir starfsmenntun og/eða eitt forgangsatriði sem ákveðið hefur verið þvert á öll skólastig/æskulýðsstarf.

Samþykkt verkefni þurfa sömuleiðis að styðja við evrópsk stefnumið í starfsmenntun um að auka gæði menntunar og stuðla að virkara samstarfi á milli starfsmenntastofnana, atvinnulífs og stjórnvalda til að mæta betur eftirspurn eftir hæfni á vinnumarkaði til framtíðar.

Nánar er fjallað um stefnumörkun á sviði starfsmenntunar í eftirarandi gögnum: The Council Recommendation on vocational education and training, The Osnabrück Declaration, og The European Skills Agenda.

Öll samstarfsverkefni á sviði starfsmenntunar þurfa að styðja við a.m.k. eitt af þeim forgangsatriðum sem ákveðin hafa verið fyrir starfsmenntun og/eða eitt forgangsatriði sem ákveðið hefur verið þvert á öll skólastig/æskulýðsstarf.

Fyrir umsóknarfrest 2025 hafa verið skilgreind eftirfarandi forgangsatriði fyrir samstarfsverkefni á sviði starfsmenntunar:

• Þróun starfsmenntunar í samræmi við þarfir vinnumarkaðar

• Aukinn sveigjanleika og tækifæri í starfsmenntun

• Stuðningur við nýbreytni í starfsmenntun

• Aukið aðgengi og aðdráttarafl starfsmenntunar

• Þróun og framkvæmd alþjóðastefnu starfsmenntaskóla

• Aukið gæðaeftirlit og leiðir til að mæla og auka gæði í starfsmenntun

• Grunnfærni: markmið þessa forgangsatriðis er að þróa aðferðir og efni sem styður við grunnfærni í starfsmenntanámi, þ.e. stærðfræði, læsi, tungumálum og stafrænum aðferðum

• Stuðningur við viðbrögð og verkefni evrópskra mennta- og þjálfunarkerfa sem tengjast afleiðingum stríðsins í Úkraínu

Athugið að nauðsynlegt er að skoða vel hvert forgangsatriði í handbók Erasmus+ þar sem þau eru útskýrð nánar.

Almenn forgangsatriði Erasmus+ áætlunarinnar sem gilda um öll skólastig og æskulýðsstarf (horizontal priorities)  snúa að inngildingu, grænum áherslum, stafrænum áherslum og virkri þátttöku  

Einungis lögaðilar geta sótt um styrki til að vinna samstarfsverkefni. Áætlunin veitir aðilum sem starfa á sviði starfsmenntunar; skólum, stofnunum, fyrirtækjum, opinberum aðilum, starfsgreinasamböndum og öðrum mögulegum samstarfsaðilum tækifæri til að vinna verkefni með skólum, stofnunum og fyrirtækjum í öðrum löndum í því skyni að auka gæði og samstarf milli starfsmenntunaraðila.

Lögaðilar í þátttökulöndunum Erasmus+ áætlunarinnar geta sótt um styrk og tekið þátt.  Stofnanir og samtök frá löndum á svæðum 1-3 (fyrir utan Belarús) geta tekið þátt en ekki verið umsækjendur.

Einstaka stofnanir geta tekið þátt í mest 10 umsóknum um stærri samstarfsverkefni í hverjum umsóknarfresti. Í smærri samstarfsverkefnum geta einstaka stofnanir aðeins tekið þátt í fimm umsóknum í hverjum fresti. Með þátttöku í verkefnum er átt við bæði umsækjendur og samstarfsaðila.

Styrkir til samstarfsverkefna eru veittir í formi fastrar upphæðar (lump sum) og umsækjendur geta sótt um eftirfarandi upphæðir

Allir verkefnastyrkir Erasmus+ eru stuðningur og gera ráð fyrir mótframlagi aðila verkefnisins. Í umsókninni er ekki farið fram á að mótframlag sé útskýrt í smáatriðum heldur þarf áætlaður kostnaður við framkvæmd verkefnisins að vera hærri en styrkupphæðin sem sótt er um.

Við gerð fjárhagsáætlunar ber að hafa í huga að ef hún er metin óraunhæf verður að hafna umsókninni. Við afgreiðslu umsókna er ekki hægt að lækka styrkupphæð sem sótt er um.

Styrkupphæðin snýr að þeim verkþáttum sem leyfilegir eru í Erasmus+ samstarfsverkefnum, m.a:

• Verkefnisstjórn (áætlanagerð, fjármál, samskipti og samhæfing milli samstarfsaðila, eftirfylgni, umsjón o.s.frv)
• Námsviðburðir (learning activities)
• Kennslu- og þjálfunarviðburðir (teaching and training activities)
• Fundir og viðburðir
• Afurðir verkefnisins (útgefið efni, skjöl, verkfæri, afurðir o.s.frv)
• Miðlun á niðurstöðum og afurðum verkefnisins
  
  

Stærri samstarfsverkefni (Cooperation Partnerships) geta varað í 12 – 36 mánuði

Lágmarksfjöldi samstarfsaðila eru 3 aðilar frá þremur þátttökulöndum Erasmus+. Lögaðilar í þátttökulöndunum Erasmus+ áætlunarinnar geta sótt um styrk og tekið þátt. Stofnanir og samtök frá löndum á svæðum 1-3 (fyrir utan Belarús) geta tekið þátt en ekki verið umsækjendur.

Einstaka stofnanir geta tekið þátt í mest 10 umsóknum um stærri samstarfsverkefni í hverjum umsóknarfresti, hvort heldur er sem umsækjendur eða samstarfsaðilar.

Styrkt verkefni skulu taka mið af stefnumörkun Evrópusambandsins í starfsmenntun og forgangsatriðum sem samþykkt hafa verið fyrir starfsmenntun árið 2025,  s.s. að aðlaga starfsmenntun að vinnumarkaði, auka sveigjanleika og tækifæri í starfsmenntun, stuðla að nýsköpun í starfsmenntun o.fl. 

Smærri samstarfsverkefni (Small-Scale) geta varað í 6 - 24 mánuði.  

Lágmarksfjöldi samstarfsaðila eru tveir aðilar frá tveimur þátttökulöndum Erasmus+.

Einstaka stofnanir geta tekið þátt í mest fimm umsóknum um smærri samstarfsverkefni í hverjum umsóknarfresti, hvort heldur er sem umsækjendur eða samstarfsaðilar.

Eitt markmiða smærri samstarfsverkefna er að auðvelda aðgengi að Erasmus+ áætluninni fyrir nýliða og minni skóla, stofnanir og fyrirtæki. Einnig að styðja jöfn tækifæri fyrir alla, borgaralega þátttöku og evrópsk gildi í nærsamfélaginu.

Mat á verkefnisumsóknum bæði smærri og stærri samstarfsverkefna er í samræmi við markmið og eðli samstarfsins. Miðað við markmið verkefnanna geta þau verið misstór og byggð upp á mismunandi hátt.

Umsækjendur finna sjálfir sína samstarfsaðila og eru upplýsingar um þá hluti af umsókn. Mikilvægt er að vanda vel valið á samstarfsaðila og kynna sér þeirra reynslu og fagsvið.

• Tengslaráðstefnur eru skipulagðar af landskrifstofum Erasmus+. Þessar ráðstefnur eru kynntar á heimasíðum landskrifstofa jafnóðum og upplýsingar um þær berast.

• EPALE, vefgátt fullorðinsfræðslu í Evrópu býður upp á leit að samstarfsaðilum (partner search). Stofnanir eða félagasamtök innan fullorðinsfræðslu geta skráð sig á EPALE og komist í samband við áhugasama aðila í öðrum Evrópulöndum.

• School Education Gateway er torg þar sem kennarar, skólafólk, sérfræðingar og raunar allir sem tengjast kennslu og skólaþróun á leik-, grunn- og framhaldsskólastigi koma saman. Þar er m.a. að finna verkfæri sem koma að notum við leit að samstarfsaðilum

• Í Gagnabanka Erasmus+ verkefna eru upplýsingar um Erasmus+ verkefni sem er lokið;  niðurstöður þeirra og þar er einnig listi samstarfsaðila. Bæði getur verið gagnlegt að skoða þau verkefni sem unnin hafa verið á því sviði sem þú ert að hugsa um og einnig er mögulegt að finna áhugaverða samstarfsaðila.

Áður en sótt er um þarf að ganga úr skugga um að stofnunin/fyrirtækið sem sækir um styrkinn sé með svokallað OID númer. Til að sækja slíkt númer þarf EU-login aðgang. Hér eru nánari upplýsingar um hvernig sótt er um í Erasmus+ sem og ítarlegar leiðbeiningar um EU-login aðgang og OID númer.