Euroguidance vinnustofa með Dr. Amundson og Andreu Fruhling: Nýjar leiðir í náms- og starfsráðgjöf

4.4.2025

Mánudaginn 31. mars 2025 stóð Euroguidance á Íslandi fyrir faglegri vinnustofu með hinum þekktu sérfræðingum í náms- og starfsráðgjöf, Dr. Norman Amundson og Andreu Fruhling, sem haldin var á hótelinu Reykjavík Natura – Berjaya Iceland. Vinnustofan bar yfirskriftina Career Wayfinding: Practical Strategies for Career Development og var skipulögð í samstarfi við Félag náms- og starfsráðgjafa (FNS),  EPALE á Íslandi, Miðstöð menntunar og skólaþjónustu (MMS) og námsbraut meistaranáms í náms- og starfsráðgjöf við Háskóla Íslands.

Um 40 náms- og starfsráðgjafar sóttu vinnustofuna á staðnum og um 20 fylgdust með í streymi.

Aðalheiður Jónsdóttir, sviðstjóri Mennta- og menningarsviðs Rannís, setti vinnustofuna með ávarpi þar sem hún lagði áherslu á mikilvægi alþjóðlegs samstarfs og faglegrar símenntunar á sviði náms- og starfsráðgjafar, og þakkaði samstarfsaðilum fyrir að gera þessa heimsókn mögulega.

Alþjóðavæðing og nýsköpun í ráðgjöf

Vinnustofan fól í sér einstakt tækifæri til að kynnast nýjustu alþjóðlegu þróun í ráðgjöf, byggðri á hugmyndafræði um von, myndlíkingar og skapandi vinnubrögð, sem einkenna störf Dr. Amundson og Andreu Fruhling. Þau leiddu þátttakendur í gegnum fjölbreyttar aðferðir úr nýútkominni bók sinni Career Wayfinder: Discovering Your Career Through Delightfully Practical Projects, þar á meðal Career Wheel, Mapping, Vantage Points og Tactile Metaphors. Þessar aðferðir nýtast í ráðgjöf við að styðja skjólstæðinga í breytingum, styrkja sjálfstraust þeirra og hjálpa þeim að sjá nýja möguleika í náms- og starfsferli sínum.

Samhljómur við stefnu Euroguidance

Viðburðurinn fellur vel að stefnu og markmiðum Euroguidance, sem miðar að því að efla alþjóðlega hæfni ráðgjafa og auka gæði náms- og starfsráðgjafar í Evrópu. Með því að bjóða inn virtum alþjóðlegum fræðimönnum og miðla nýjum aðferðum, er stuðlað að aukinni fagmennsku og alþjóðavæðingu greinarinnar. Euroguidance á Íslandi hefur það að markmiði að styðja ráðgjafa í að nota alþjóðleg tækifæri í ráðgjöf, auka færni til að leiðbeina um nám og störf í Evrópu og tengja íslenskan ráðgjafaheim við evrópska umræðu og þróun.

Einnig samræmist vinnustofan vel áherslum EPALE - vefgátt fullorðinsfræðslu í Evrópu. Þar er lögð sérstök áhersla á að efla færni fagfólks í símenntun, efla sköpun, samvinnu og að deila gæðaaðferðum og nýjungum milli landa. Með þátttöku í slíkum viðburðum fá ráðgjafar og fræðafólk tækifæri til að dýpka þekkingu sína, prófa nýjar aðferðir og spegla starf sitt í alþjóðlegu samhengi – sem styður við það markmið EPALE að efla gæði og áhrif námstækifæra fyrir fullorðna í Evrópu.

Mikilvægur samruni innlendra og alþjóðlegra strauma

Þessi vel sótta og vel heppnaða vinnustofa undirstrikar hvernig samtal og samvinna milli innlendra og alþjóðlegra aðila getur styrkt náms- og starfsráðgjöf á Íslandi. Hún sýnir einnig fram á mikilvægi þess að ráðgjafar hafi aðgang að nýjustu aðferðum og nálgunum sem byggðar eru á rannsóknum, skapandi hugsun og alþjóðlegri sýn – lykilatriði í því að bjóða upp á þjónustu sem mætir þörfum fólks í nútíma samfélagi.