Evrópski tungumáladagurinn er 26. september!

26.9.2022

Hið almenna markmið dagsins er að vekja athygli á ríkulegum tungumála- og menningarlegum fjölbreytileika Evrópu, sem þarf að hvetja til og viðhalda, en einnig að bæta úrval tungumála sem fólk lærir á lífsleiðinni. Með því að auka við tungumálaskilning okkar eflum við skilning okkar á öðrum menningum og samfélagslega færni. Evrópski tungumáladagurinn (EDL – European Day of Languages) er tækifæri til að fagna öllum tungumálum Evrópu, bæði stórum og smáum.

Í tilefni dagsins hafa verið skipulagðir viðburðir úti í Evrópu, en í ár tengjast hátíðahöldin Evrópuári unga fólksins sem haldið er hátíðlegt árið 2022. Hægt er að fylgjast með dagskránni á netinu, en m.a. verða nokkrir evrópskir skólar heimsóttir. Þessir skólar eru í Portúgal, Svíþjóð, Eistlandi og á Spáni og er þar lögð mikil áhersla á fjölbreytta tungumálakennslu til að stuðla að inngildingu. Dagskráin er frá klukkan 10-12 á íslenskum tíma. Sjá nánar hér.

Rannís sér um og tekur þátt í ýmsu starfi sem snýr af eflingu tungumála og skilning okkar á þeim. Evrópumerkið er eitt af þessum verkefnum, en þar veitir Rannís í samstarfi við Mennta- og barnamálaráðuneytið viðurkenningu fyrir nýbreytniverkefni á sviði tungumálanáms og kennslu.  Rannís er einnig tengiliður Tungumálamiðstöðvarinnar í Graz á Íslandi og veitir upplýsingar um starfsemi stofnunarinnar.

Óhætt er að segja að Erasmus+ hafi eflt tungumálakunnáttu þeirra fjölmörgu einstaklinga sem hafa farið milli landa á vegum áætlunarinnar. Tungumál í öllum sínum fjölbreytileika eru einmitt áhersluatriði í Erasmus+ og veittur er sérstakur stuðningur á þessu sviði svo þátttakendur geti aukið færni sína í erlendum málum þeim að kostnaðarlausu

Rannís sér líka um umsjón norrænu tungumálaáætlunar Nordplus, sem veitir styrki fyrir alla þá sem starfa að kennslu og miðlun norrænna tungumála á Norðurlöndum og Eystrasaltslöndum. Verkefnin eru margbreytileg og eitt slíkt var samstarfsverkefni milli Íslands og Litháens þar sem að litháenskir nemendur fengu að kynnast forníslensku í gegnum dans.

Upplýsingastofa um nám erlendis og Eurodesk eru upplýsingaveitur sem miðla að því að aðstoða ungt fólk við að finna tækifæri erlendis, og þar er meðal annars boðið upp á styrki til tungumála. Hvort sem að þú hefur áhuga á að fara út í nám, störf eða sjálfboðavinnu þá getum við hjálpað þér að finna eitthvað við hæfi – allt til að bæta þína færni í evrópskum tungumálum!

Við hvetjum öll til að fagna degi evrópskra tungumála með okkur og að kynna sér þau tækifæri sem standa til boða!