Framtíðarsýn fyrir háskóla kynnt í nýrri Evrópustefnu á dögunum

3.2.2022

  • People-g4eebfc5da_1920

Evrópskir háskólar eru á krossgötum í kjölfar heimsfaraldurs og gegna lykilhlutverki í að takast á við áskoranir eins og hlýnun jarðar, stafræna umbyltingu og hækkandi aldur þjóða. Nýrri evrópskri háskólastefnu er ætlað að styðja þá í að leggja sitt af mörkum til að efla sjálfbærni og seiglu í álfunni.  

Í Evrópu eru 17,5 milljónir háskólanema, 1,35 milljón háskólakennara, 1,17 milljón vísindafólks og nær 5000 starfandi háskólar. Háskólastefnan á að hjálpa þeim öllum við að laga sig að breytilegum aðstæðum í samfélaginu og uppfylla fjögur meginmarkmið:

  • að efla Evrópuvídd í háskólamenntun og rannsóknum

  • að styðja við háskólaumhverfi sem samræmist evrópskum gildum með áherslu á gæði, færni til framtíðar, inngildingu, lýðræði og grundvallarmannréttindi

  • að styrkja stöðu háskóla sem umbótaafls í þágu sjálfbærni og stafrænnar þróunar

  • að styrkja stöðu háskólamenntunar í Evrópu á heimsmælikvarða

Á sama tíma og Evrópustefnan var gefin út birti framkvæmdastjórn Evrópusambandsins drög að tilmælum sem ætlað er að dýpka samstarf milli evrópskra háskóla og gera þeim kleift að setja á fót sameiginlegar námsleiðir og gráður. Stefnunni og tilmælunum verður fylgt eftir með ýmsum aðgerðum á næstu árum. Þar má nefna fjármagn til aukins fjölda evrópskra háskólaneta, sem verða 60 talsins árið 2024. Meira en 500 háskólar munu geta tekið þátt í slíkum netum, þar sem áhersla er lögð á langtímasamstarf um menntun, rannsóknir og nýsköpun.

Landskrifstofa Erasmus+ á Íslandi hvetur umsækjendur á sviði háskóla til að kynna sér efni stefnunnar vel, enda er mikilvægt að viðfangsefni Erasmus+ verkefna séu í samræmi við þá stefnumörkun sem Evrópusambandið setur í hverjum málaflokki.

Nánari upplýsingar um evrópska stefnu á sviði háskóla:

Fréttir

Þetta vefsvæði byggir á Eplica