Nýtt tímabil European Solidarity Corps er hafið

19.4.2021

European Solidarity Corps gerir samtökum á Íslandi kleift að óska eftir að fá til sín sjálfboðaliða og hvetur ungt fólk til að setja á fót samfélagsverkefni sem hafa jákvæð áhrif á nærumhverfi sitt. Megináhersla áætlunarinnar er á samstöðu og markmið hennar er að efla samfélagslega þátttöku fólks á aldrinum 18-30 ára. Ungt fólk getur gerst sjálfboðaliðar í Evrópu í tvær vikur til 12 mánuði. 

Alls verður rúmum milljarði evra varið í European Solidarity Corps, sem mun skila sér í sjálfboðaliðastörf og önnur fjölbreytt verkefni leidd af ungu fólki. Fjármagninu er ætlað að skapa tækifæri fyrir allt að 270.000 ungmenni um gjörvalla Evrópu sem auðvelda þeim að takast á við samfélagslegar áskoranir. Í því samhengi er sérstök áhersla lögð á inngildingu, grænar lausnir og stafræna þróun. Á árinu 2021 verða tæplega 700 þúsund evrur til úthlutunar fyrir verkefni sem fara fram á Íslandi.

„Ungt fólk hefur margt að gefa til samfélagsins. Við viljum hvetja þau til að taka virkan þátt, sýna samstöðu og gefa tíma sinn í þágu málefna sem skipta þau máli. Að taka þátt í European Solidarity Corps er líka dýrmætt tækifæri til að öðlast reynslu og nýja færni.“

_{Mariya Gabriel, framkvæmdastjóri nýsköpunar, menningar, menntunar og æskulýðsmála hjá Framkvæmdastjórn ESB}

Næsti umsóknarfrestur fyrir styrkina er 28. maí. Ungu fólki sem vill gerast sjálfboðaliðar er bent á ungmennagáttina European Youth Portal, þar sem hægt er að sjá tækifærin sem í boði eru.

Nánari upplýsingar:

• Vefsíða Landskrifstofu um European Solidarity Corps

• Auglýsing Evrópusambandsins fyrir umsóknir í ESC 2021

• Handbók ESC 2021

• Umsóknir

• Fréttatilkynning Evrópusambandsins um ESC 2021-2027

• Upplýsingablað Evrópusambandsins um ESC 2021-2027