Opnað fyrir DiscoverEU umsóknir fyrir ungmenni á 18. aldursári

3.4.2025

Discover EU er frumkvæðisverkefni á vegum Erasmus+ þar sem 50 heppin íslensk ungmenni fá þrjátíu daga lestarpassa auk flugmiða fram og til baka til að hefja og ljúka ferðalaginu. Nú þegar hafa yfir 300 ungmenni frá Íslandi ferðast á vegum DiscoverEU.

Markmið happdrættisins er að gera 18 ára ungmennum kleift að upplifa Evrópu og gefa þeim færi á að kynnast menningararfleið, sögu og fólki álfunnar. Í þessari umferð er happdrættið opið öllum ungmennum sem búsett eru á Íslandi (óháð þjóðerni) sem fæddust á tímabilinu 1. júlí 2006 til 30. júní 2007.

Hægt er að sækja um bæði sem einstaklingur og sem fimm manna hópur, og ef hópurinn er dreginn út fá öll í hópnum passa. Handhöfum ferðapassans gefst tækifæri á að taka þátt í DiscoverEU viðburðum víðs vegar um Evrópu sem eru skipulagðir af þeim sem halda utan um DiscoverEU í hverju landi. Landskrifstofa Erasmus+ á Íslandi gegnir því hlutverki gagnvart þeim ferðalöngum sem hingað koma til lands.

Happdrættið hófst 2. apríl, og er opið til 16. apríl 2025 kl. 10:00 að íslenskum tíma. 

Nánari upplýsingar um DiscoveEU happdrættið