Ráðstefna um eflingu stafrænnar borgaravitundar gegnum Evrópusamstarf í Eddu

1.4.2025

Í tilefni Evrópuárs um stafræna borgaravitund stendur Rannís fyrir ráðstefnu á Evrópudeginum 9. maí kl. 13:30 sem ber yfirskriftina Evrópusamstarf í stafrænum heimi - Fræðsla til framtíðar. Þar verður sjónum beint að því hvernig formlegt og óformlegt nám getur hjálpað fólki að taka virkan þátt í stafrænu samfélagi.

Stafræn borgaravitund er ekki einungis lykill að öruggri og ábyrgri netnotkun heldur er hún einnig grundvöllur þess að einstaklingar geti tekið upplýstar ákvarðanir og virkan og farsælan þátt í samfélaginu. En hvernig geta skólar, stofnanir og samtök eflt fólk í gagnrýnni hugsun og samskiptafærni á netinu og hvernig getur evrópskt samstarf hjálpað?

Ráðstefnan býður upp á umræður um kennslu stafrænnar borgaravitundar, mikilvægi hennar og innleiðingu hér á landi. Sérstök áhersla verður lögð á alþjóðlegt samstarf á þessu sviði gegnum Evrópusambandsáætlanirnar Erasmus+ og eTwinning, en sú síðarnefnda fagnar 20 ára afmæli sínu í ár. Á viðburðinum mun einnig verða fjallað um önnur stoðverkefni Erasmus+ áætlunarinnar sem fagna tímamótum í ár, en það eru EPALE sem fagnar 10 ára afmæli, Europass 20 ára og heil 35 ár eru liðin síðan Eurodesk var sett á fót. Þá verða frumsýnd myndbönd um verkefni styrkt úr þessum áætlunum þar sem vel hefur tekist að takast á við þær áskoranir sem fylgja stafrænum miðlum og að finna leiðir til árangurs í samstarfi við önnur lönd í Evrópu.

Dagskrá:

13:30	Ráðstefna sett
13:40	Opnunarávörp
14:10	Pallborðsumræður: Af hverju er kennsla stafrænnar borgarvitundar svo aðkallandi og hvernig hefur hún verið innleidd á Íslandi?
14:50	Pallborðsumræður: Hvernig opnar Evrópusamstarf nýja möguleika til að efla stafræna borgaravitund?
15:30	Ráðstefnu slitið og boðið upp á léttar veitingar

* Dagskráin er birt með fyrirvara um breytingar og nánari upplýsingar um þátttakendur verða birtar á næstunni.

Ráðstefnan fer fram í Eddu, húsi íslenskunnar, Arngrímsgötu 5, og gott aðgengi er að byggingunni. Í samræmi við grænar áherslur Landskrifstofu Erasmus+ eru þátttakendur hvattir til að nýta sér umhverfisvæna ferðamáta til að sækja ráðstefnuna. Strætóleiðir 1, 3, 6, 11, 12 og 15 stoppa allar í grennd við Eddu.

Ráðstefnan er öllum opin og sérstaklega eru þau hvött til að mæta sem starfa á sviði menntunar, æskulýðsmála og íþrótta og vill auka þekkingu sína á því hvernig má vinna með stafræna borgaravitund fólks á öllum aldri í innlendu og evrópsku samhengi. Um staðfund er að ræða en ráðstefnan verður tekin upp og gerð aðgengileg á síðu erasmusplus.is að henni lokinni. Þátttakendur utan höfuðborgarsvæðisins geta óskað eftir ferðastyrk í skráningarforminu til að auðvelda þátttöku.