Stuðningur háskóla er mikilvæg forsenda fyrir þátttöku hinsegin nemenda í stúdentaskiptum

6.8.2024

Viðamiklar rannsóknir hafa verið gerðar víða um heim um alþjóðleg stúdentaskipti og hvernig félagslegir þættir eins og efnahagur, kyn og fötlun geta haft áhrif á þátttöku og upplifun fólks sem sækir sér menntun utan landsteinanna. Hins vegar hefur reynsla hinsegin nemenda af stúdentaskiptum hlotið takmarkaða athygli og lítið er vitað um þær hindranir og hvata sem þessir nemendur finna fyrir.

Þetta er ein af niðurstöðum evrópska tengslanetsins European Network on International Student Mobility: Connecting Research and Practice (CA20115), sem styrkt er af COST (European Cooperation in Science and Technology). COST-netið leitast við að leiða saman fræðafólk á sviði alþjóðlegra stúdentaskipta og fólk sem starfar við stúdentaskipti í þeim tilgangi að læra hvert af öðru. Slíkt samstarf verður til þess að fagfólk getur byggt starf sitt og stefnumótun á vísindalegum grunni.

Forstöðukona Landskrifstofu Erasmus+ á Íslandi, Rúna V. Guðmarsdóttir, er fulltrúi Íslands í COST-netinu og hefur meðal annars tekið þátt í samstarfi um hinsegin nemendur og stúdentaskipti. Það felur meðal í sér að taka saman niðurstöður úr akademískum greinum og vinna úr þeim hagnýtar ráðleggingar fyrir háskóla um hvernig þeir geta stutt við hinsegin nemendur og þátttöku þeirra í Erasmus+ og öðrum áætlunum. Sem dæmi má nefna mikilvægi þess að háskólar taki þátt í réttindabaráttu hinsegin fólks, tileinki sér viðeigandi tungutak og hugtök, hjálpi nemendum að taka upplýstar ákvarðanir um skiptinámið með öryggi þeirra í huga og styðji fólk með ólíkan bakgrunn við að sýna hvert öðru virðingu og fagna fjölbreytileikanum.

Þeim sem vilja kynna sér betur hvað fræðin segja um hinsegin nemendur í stúdentaskiptum og hvernig styðja má við þátttöku þeirra enn frekar er bent á eftirfarandi efni:

• Bloggfærsla á síðu European Association for International Education
• Samantekt á síðu European Network on International Student Mobility
• Hlaðvarpsþáttur á Spotify