Töflustund gefur gull í mund

14.11.2022

Sum okkar sjá um að kynna styrktækifærin fyrir íslensku mennta- og æskulýðssamfélagi, önnur sinna eftirlitsstörfum með verkefnum og utanumhald með tölfræði og enn önnur eru sérfræðingar í tilteknum verkefnaflokki, afgreiða umsóknir og veita stuðning og ráðgjöf meðan á verkefnunum stendur. Í okkar hópi eru líka fulltrúar á sérstökum málasviðum, til dæmis varðandi inngildingu, stafræna væðingu eða sjálfbærni. Erasmus+ og European Solidarity Corps þjóna breiðum markhópi og hafa fjölbreytt áhersluatriði – þess vegna getum við öll fundið verkefni sem falla að okkar sérþekkingu og áhugasviði.

Í upphafi síðasta árs tókum við upp töflufundi til að bæta yfirsýnina á skrifstofunni, jafna álag, forgangsraða verkefnum og fylgja framvindu þeirra eftir. Við hittumst á morgnana þrisvar í viku og eins og myndin sýnir er bæði gaman og gagnlegt að bera saman bækur okkar á þennan hátt.