Alþjóðavæðing kennaramenntunar rædd á fjölþjóðlegri Erasmus+ ráðstefnu í Reykjavík

16.12.2019

Kennarar framtíðarinnar hafa hér lykilhlutverki að gegna og það er því afar mikilvægt að þeim gefist tækifæri til að læra og fá þjálfun í umhverfi sem styður þau í að víkka sjóndeildarhring sinn og efla fjölmenningarlega færni. Samt sem áður vill kennaramenntun oft verða bundin við landsteinana, og kennaranemar fara ekki í skiptinám eða starfsþjálfun erlendis í sama mæli og aðrir.

Jafnvel þótt nemendur í kennaranámi og öðrum menntavísindum séu um 12% allra háskólanema á Íslandi er hlutfall þeirra af þeim sem taka þátt í Erasmus+ aðeins um 2%, samkvæmt tölfræðilegum upplýsingum Rannís, landskrifstofu Erasmus+ á Íslandi, frá 2017. Í samstarfi við EDUFI, sem rekur finnsku Erasmus+ landskrifstofuna, skipulagði Rannís ráðstefnu í Reykjavík 3.-5. desember síðastliðinn, sem leiddi saman um það bil 70 þátttakendur – alþjóðafulltrúa, nemendur og kennara – frá ólíkum Evrópulöndum með það markmið að finna sameiginlegar leiðir til að styðja við alþjóðlega reynslu í kennaranámi.

Fyrirlesarar á ráðstefnunni komu úr hópi rannsakenda á sviði alþjóðavæðingar, alheimsmenntunar og félagslegs réttlætis sem og nemenda. Hópavinna leiddi í ljós að margar þær hindranir sem verða á vegi kennaranema þegar kemur að námsdvöl erlendis eru sameiginlegar ólíkum löndum. Ræddar voru leiðir til efla þátttöku þeirra í skiptinámi og starfsþjálfun í útlöndum og má þar helst nefna öflugt kynningarstarf meðal ungmenna áður en háskólaganga þeirra hefst, tækifæri til að fara út í skemmri tíma og á sumarnámskeið og að tileinka eitt misseri í námskrá kennaranema dvöl erlendis. Áhersla var lögð á mikilvægi þess að bjóða upp á kennaranám sem er alþjóðlegt í eðli sínu – til dæmis með þátttöku erlendra nemenda og kennara og samvinnu við kennaranema í öðrum löndum með hjálp verkfæra eins og eTwinning. Þannig getur alþjóðavæðing heima fyrir stutt kennara framtíðarinnar við að veita sjálfbæra menntun fyrir alla.