Auglýst eftir umsóknum í Erasmus+ 2024

28.11.2023

Sem fyrr er um fjölbreytt tækifæri að ræða sem styðja nemendur, kennara, starfsfólk og ungmenni við að afla sér reynslu og þekkingar á erlendri grundu. Samstarfsverkefni leiða saman stofnanir og samtök í ólíkum löndum til að vinna að forgangsatriðunum fjórum: inngildingu, sjálfbærni, stafrænni þróun og virkri þátttöku í samfélaginu.

Erasmus+ verkefni eru af ólíkri stærð og gerð. Þau spanna allt frá innlendum þátttökuverkefnum til lítilla fjölþjóðlegra verkefna og yfir í stefnumótandi samstarf eins og Evrópsk háskólanet, Öndvegissetur starfsmenntunar og Kennaraakademíur. Áframhaldandi áhersla er lögð á hlutverk Erasmus+ við að efla samevrópsk gildi, svo sem mannréttindi og mannlega reisn, frelsi, lýðræði og jafnrétti.

Í mörgum verkefnaflokkum hafa styrkupphæðir verið hækkaðar enn frekar til að koma til móts við áhrif verðbólgunnar og hækkandi verðlag í álfunni, en á síðasta ári kom einnig til hækkunar vegna þessa.

Íslenska Landskrifstofan mun geta styrkt verkefni um rúmlega 10 milljónir evra í menntahluta Erasmus+ og þrjár milljónir evra í æskulýðshlutanum á árinu 2024.

Starfsfólk Landskrifstofu Erasmus+ á Íslandi hvetur umsækjendur hér á landi til að kynna sér vel þá styrkmöguleika sem í boði eru. Sérstaklega skal bent á ráðleggingar Landskrifstofu varðandi val á samstarfsaðilum.

Þau sem hafa spurningar um umsóknarferlið eru eindregið hvött til að hringja eða skrifa tölvupóst til viðkomandi verkefnastjóra. Ennfremur eru umsækjendur hvattir til að taka þátt í hinum ýmsu kynningarviðburðum sem Landskrifstofan mun standa fyrir víða um land og á netinu á komandi vikum og mánuðum.
Nánari upplýsingar um kynningarviðburði

Umsóknareyðublöð eru byrjuð að birtast á Erasmus+ torginu. Þau sem ekki eru í boði nú þegar verða gerð aðgengileg þar fljótlega.

Nánari upplýsingar

• Handbók Erasmus+ 2024
• Auglýsing um Erasmus+ umsóknir 2024
• Vinnuáætlun Erasmus+ 2024
• Fréttatilkynning frá framkvæmdastjórn Evrópusambandsins
• Umsóknarfrestir ársins